ناصر تركي يكتب: خروج الأهلي من البطولة الأفريقية

مش مستغرب خروج الأهلي من البطولة الأفريقية.. المستغرب بجد هو إدارة بتشوف كل ده وساكتة!
الأهلي بقاله أكتر من سنتين بيتراجع.. حتى وهو بيكسب بطولات.. لأن البطولات دي كانت بتغطي على الحقيقة مش بتعالجها!

إحنا مش زعلانين على بطولة.. إحنا زعلانين على كيان بيتسحب منه شخصيته واحدة واحدة
فين روح الأهلي؟
فين القتال؟
فين الرجولة اللي كانت بترعب أي منافس؟
اللي حاصل دلوقتي:
• لا لعب جماعي
• لا التزام
• لا روح
• نجومية على السوشيال ميديا أكتر من الملعب
• ملايين بتتصرف على لاعبين لا يستحقوا ارتداء التيشيرت
والإدارة؟
بتتفرج… أو يمكن مش شايفة!
الأخطر بقى..
فين أبناء الأهلي؟!
فين رموز النادي اللي شايلين تاريخه وفاهمين شخصيته؟
ليه دايمًا الحل السهل: مدرب أجنبي “على الورق” بياخد ملايين.. وفي الآخر لا بيصنع فريق ولا بيبني جيل؟
ليه مفيش خطة واضحة لـ:
–  تأهيل أبناء الأهلي كمدربين حقيقيين
– إرسالهم معايشات لأكبر أندية العالم
– بناء مدرسة كروية خاصة بالأهلي ترجع هيبته الفنية.

الأهلي عمره ما كان بيستورد شخصيته.. الأهلي كان بيصنعها من جوه كيان النادي..

لكن اللي بيحصل دلوقتي هو:

إهدار مال + غياب رؤية + مجاملات + قرارات ضعيفة
كفاية بقى!

الحل واضح:

– رحيل أي لاعب مهما كان اسمه لو مش قد المسئولية
– تعيين مدير كرة قوي يعيد الانضباط فورًا
– بناء فريق بروح الأهلي مش بأسماء تريند
– استثمار حقيقي في الناشئين وأبناء النادي
– وقف نزيف الأموال على صفقات ومدربين بلا قيمة.

الأهلي مش نادي عادي.. الأهلي كيان أكبر من أي لاعب.. وأكبر من أي إدارة.. ولو الإدارة مش قادرة تحافظ على شخصية الأهلي.. يبقى لازم تعيد حساباتها فورًا.. قبل ما التاريخ يحاسبها!